विदेह प्रथम मैथिली पाक्षिक ई पत्रिका

कल्पना झा

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-१२

पोथी-प्रेमी 'विद्यालंकार'

पटना शहरमे आएल 1975 क भयंकर बाढ़िक चर्चा के नहि सुनने होएत.....ओही समयक एकटा रोचक प्रकरण सुनबैत छलाह हमर ससुर श्रीकान्त झा। रोचक कही वा भयावह, असमंजसमे छी कने हम। ओ समय तऽ भयावहे छल। ओही भयावह समयमे पटनाक बोरिंग रोड चौराहासँ निकलल एकटा गली (जे बादमे 'कवि रमण पथ' रूपमे जानल जाए लागल) स्थित ''विद्यालंकार भवन"क बरामदा पर आराम कुर्सी लगाए निश्चिन्तसँ बैसल छलाह एकटा 74 वर्षीय वृद्ध व्यक्ति। धिया-पूता बेर-बेर कहनि, "चलू बाबूजी उपरका तल्ला पर....पानि कखनो हेलि देत घरमे" मुदा ओ किएक सुनताह। ओ पूर्णतया आश्वस्त छलाह जे हुनका घरमे पानि नहि ढुकतनि। किन्नहुँ नहि ढुकतनि। कारण ओहि मुहल्लामे अधिकांश घर जे बनल छलै, तकर प्लिन्थ रोडसँ बहुत उँचगर देल गेल छलै। विशेष रूपसँ "श्री भवन" (व्यास जीक घर) आ ''विद्यालंकार भवन"क बरामदा बेस उँचगर छलै, से हमरा आँखिक देखल अछि। मुदा ओहि शुद्ध सात्विक विचारधाराक लोककेँ ई कहाँ बूझल छलनि जे ई बाढ़ि प्राकृतिक आपदा नहि अछि, ई तऽ मनुक्ख-निर्मित आपदा अछि। एहन मानव-निर्मित आपदा कतबो उँचगरसँ उँचगर प्लिन्थ टपि सकैत अछि। आ सएह भेलनि। शनै: शनै: पानि बढ़िते चलि गेलनि। आँखिक सोझाँ पूरा हाता (कैम्पस) जलमग्न भऽ गेलनि। जखन हुनकर चरण पखारबा लेल पानिक प्रवाह बरामदाक सीढ़ी टपए लगलनि, तखन आराम कुर्सी परसँ हड़बड़ा कऽ उठलाह श्रीकान्त ठाकुर विद्यालंकार। हड़बड़ाहटि अपन जान आ बहुमूल्य बस्तु सभसँ बेसी घरमे ओरिआ कऽ राखल असंख्य पोथीलेल छलनि। एक्कहु टा पोथी बेरबाद नहि हुअए, ताहिलेल बेहाल। पोथीक संग असंख्य फोटोक कलेक्शन छलनि। एकटा सुच्चा पत्रकारलेल इएह सभ ने अमूल्य निधि छलैक !

घरक अन्यान्य बहुमूल्य बस्तु छोड़ि मात्र पोथीक गेंट सभ उघि-उघि उपरका तल्ला पर लऽ जेबाक हुनकर आदेशक पालन घरक हरेक सदस्य कएलथिन, तथापि बहुत पोथी भिजिए गेलनि। बादमे सभटा भिजलाहा पोथीकेँ रौदमे सुखा-सुखा कऽ, एकहक टा पन्ना चक्कूक मददिसँ छोड़ाओल जेबाक टास्क भेटलनि घरक धिया-पूताकेँ। पोथीकलेल एहन मात्सर्य छलनि 'विद्यालंकार' जीक हृदयमे।

हुनकर एहि पोथी-प्रेमक विषयमे बतबैत हमरा मोनमे इहो बात बेर-बेर आबि रहल अछि जे ओ कतेक इमानदार छलाह अपन प्रोफेशनक प्रति। एकटा सुच्चा पत्रकारलेल पढ़ब, लगातार पढ़ैत रहब मात्र ज्ञानार्जनलेल आवश्यक नहि छलनि, अपितु जिम्मेदारी निभएबाक एकटा अस्त्र सेहो छलनि हुनकालेल। जे पत्रकार लगातार पढ़ैत रहत, करेंट अफेयर्स सभ पर लगातार पैनी नजरि राखत, ओ अनुमानक आधार पर समाचार नहि लिखत, आजुक अटकलबाजी बला पत्रकार सन। पढ़ैत रहएबला पत्रकार नीक, ऑथेंटिक सवाल पूछि सकैए जन-प्रतिनिधिसँ। ओ बेसी विश्वसनीयताक संग कोनो समाचार प्रस्तुत करत। आ सएह कएलनि 'विद्यालंकार' जी। आजीवन पढ़ैत रहलाह। समाचारक विश्वसनीयताक संग कोनो कॉम्प्रोमाइज कहियो नहि कएलनि।

एहन विराट व्यक्तित्वकेँ, एहन महान पत्रकारकेँ बारम्बार नमन। 

एखनुक डिजिटल युगमे तेज खबरि, माने सभसँ पहिले हम सुनौलहुँ खबरि, ताहि दबावमे पत्रकारिता भऽ रहल अछि। एहन पत्रकारिता सतही, अविश्वसनीय आ कखनोकाल हास्यास्पद सेहो बुझना जाइत अछि। गहन पठन-पाठन आ पोथी-प्रेम कतेक आवश्यक छै पत्रकारिता सन जिम्मेदार प्रोफेशनलेल, से के बुझौतनि आजुक तेज रफ्तारसँ भागैत पत्रकार आ असंख्य टी वी चैनल संग सोशल मीडिया पर यत्र-तत्र-सर्वत्र आच्छादित असंख्य न्यूज चैनलक कर्ता-धर्ताकेँ। व्यावसायिक होएबाक ई मतलब नहि ने जे केओ अपन पदकेँ, अपन काजक प्रति गैर-जिम्मेदाराना हरकत करथि आ तकरा जस्टिफाइ कएल जाए लागए। जे आइ-काल्हि भऽ रहल अछि।

'विद्यालंकार' जी पत्रकारिताक प्रतिष्ठा आ अपन प्रतिष्ठा, दुनूमे सँ ककरो संग खिलवाड़ नहि कएलनि कहियो। हुनकर पत्रकारिता सटीकता पर टिकल रहलनि सदति। इमरजेंसी समयमे जखन अफवाहक एतेक स्कोप छलए, तखनहुँ हुनकासँ कोनो एहन चूक नहि भेलनि जाहि कारणेँ ओहि समाचार-पत्र पर कोनो प्रश्न चिन्ह लगाओल जाइत। कोनो तरहक छोटो-मोटो चूक, बिनु सन्दर्भक उद्धरणकेँ किछु लिखि देब, असत्यापित दावा करब जे हमहीं ई समाचार सभसँ पहिने पाठक लग पहुँचौलहुँ, एहन प्रयास कहियो नहि कएलनि 'विद्यालंकार' जी। हुनका बूझल छलनि जे एहन एकटा हरकतसँ ओहि अखबारक प्रति लोकक भरोसा समाप्त कऽ सकैत अछि, जकरा संग सम्पादक रूपमे वा पत्रकार रूपमे जुड़ल छलाह ओ। मात्र घटनाक जनतब देब पत्रकारक काज नहि छै, ओकर सन्दर्भ, साक्ष्य आ सामाजिक अर्थ, समाज पर ओहि घटनाक प्रभाव, सभ किछु पाठक धरि पहुँचाएब आवश्यक छै, से हरेक पत्रकार बुझथु। बिना गहन पठन-पाठनकेँ रिपोर्टिंग मात्र बयानबाजी धरि सीमित रहि जाइत छै आ भ्रामक सूचना-प्रसारक खतरा भिन्ने।

पढ़ब, लगातार पढ़ैत रहब पत्रकारिताक आधार-तत्व अछि, से 'विद्यालंकार' जी कहियो नहि बिसरलाह। ओना पोथी-प्रेम जन्मजातहि छलनि हुनका भीतर आ जैं पढ़बाक हिस्सक छलनि, तैं एहन प्रोफेशनमे गेलाह; सेहो कहल जा सकैछ।

संपादकीय सूचना- एहि सिरीजक पुरान क्रम एहि लिंकपर जा कऽ पढ़ि सकैत छी-

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-1
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-2
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-3
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-4
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-5
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-6
मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-7

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-8

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-9

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-10

मैथिली साहित्यमे श्रीकान्त ठाकुर 'विद्यालंकार'एवं हुनक परिवारक योगदान-11

विद्यालंकारजीसँ पहिने विदेहपर व्यासजीक कृतित्वपर कल्पनाजी लीखि रहल छथि। पाठक व्यासजीपर प्रकाशित एखन धरिक सभ खंड निच्चा केर लिंकपर जा कऽ पढ़ि सकै छथि-

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-1

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-2

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-3

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-4

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-5

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-6

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-7

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-8

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-9

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-10

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-11

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-12

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-13

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-14

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-15

मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-16
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-17
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-18
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-19
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-20
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-21
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-22
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-23
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-24
मैथिली साहित्यमे उपेन्द्र नाथ झा 'व्यास' एवं हुनक परिवारक योगदान-25

अपन मंतव्य editorial.staff.videha@zohomail.in पर पठाउ।